Novidades

A señorita Bubble xa está nas librarías!

Podes ler a primeira crítica do libro, de María Jesús Fernández Fernández, a continuación:

Xa está aquí “A señorita Bubble” a nova e esperada novela para nenas e nenos de Ledicia Costas. Trátase dun relato no que o humor e a aventura son os principais ingredientes, enmarcados dentro dun subxénero moi actual como é o “steampunk”, inspirado na estética do século XIX e na tecnoloxía futurista dos relatos de Jules Verne na que as marabillosas máquinas, capaces das cousas máis extraordinarias, están compostas de porcas, poleas e engranaxes, funcionan a vapor ou precisan de corda que poña en marcha os seus abraiantes mecanismos.
Nesta ocasión as protagonistas son dúas nenas, as irmás Noa e Sofi, que foxen do colexio escapando da inxusta e violenta actitude de dúas profesoras. Na súa fuxida atopan coa señorita Bubble, una nova e extravagante veciña que no escaso tempo que leva vivindo na localidade ten suscitado o odio de toda a xente da vila que non é quen de admitir na súa comunidade a unha persoa tan diferente e singular, e mesmo fan correr o conto de que é unha “meiga caníbal” que secuestra nenos para cociñalos e comelos. A amizade entre as dúas nenas e a señorita Bubble vainos permitir coñecer todos os marabillosos inventos que se agochan na mansión da señorita e tamén a Vincent, un neno cunhas características moi especiais.
A ignorancia e a intransixencia dos vecinos fai que a historia estea a punto de rematar de maneira tráxica, pero, como nos ten ensinado o mestre Roald Dahl, os bos sempre saen trunfantes e as “meigas caníbal” teñen moitos recursos.
Divertido, áxil e ameno, o libro amósanos a unha estupenda escritora que é ademáis unha gran lectora que ten sabido asimilar as ensinanzas dos grandes do xénero. Neste libro está sen dúbida a pegada de Jules Verne, pero tamén a de Roald Dalh (a mansión da señorita Bubble e o que nela se agocha fainos lembrar a fábrica Willy Wonka, ademais do retrato das odiosas profesoras e o xusto e exemplar castigo que reciben polas súas maldades). Neste libro, como noutros anteriores, cremos percibir tamén a presenza de Tim Burton, de quen a autora se confesa gran admiradora. Hai varios detalles que nos fan lembrar a película “Eduardo Manstesouras”, como é a actitude violenta e intransixente das xentes da vila ante algo que non comprenden, e a presenza dese neno con “ollos de panda” que ademáis se chama Vincent (quizais unha chiscadela homenaxe a Vicente Price?)
Moi axeitadas parecéronme as ilustracións do veterano Andrés Meixide.
Os meus parabéns a autora, o ilustrador e @s editor@s.

 


“Verne y la vida secreta de las mujeres planta”, publicada por Anaya, foi  seleccionada entre as mellores obras do 2016 de Literatura Infantil e Xuvenil, por ‘El Portal del Lector’, web da Rede de Bibliotecas da Comunidade de Madrid. Esta obra é a tradución ao castelán do Premio Lazarillo 2015 “Jules Verne e a vida secreta das mulleres planta“, editada por Xerais. O libro pode atoparse tamén en catalán, baixo o título de “Verne i la vida secreta de les dones planta”, da man da Editorial Barcanova. Unha alegría enorme figurar nesta selección de magníficos títulos! Podes acceder á ligazón premendo aquí.